Böl

Á góðviðrisdegi ég datt inn á bar

Drakk ég þar öl og smá eplavínsglundur

Vegbúi nokkur sem var staddur þar

Vatt sér upp að mér og öskraði "FUNDUR!"

 

Heimtaði kauði að ég hlustaði á

Meðan hann fór með munninum orðum að æla

Hreinlega allt sem að heyrði ég þá

Var hrikalegt þvaður og endemis þvæla

 

Af heyskap og bústörfum heyrði ég nóg

Hrútspúngar súrir vízt flokkast sem fæða

Greinargóð lýsing af grisjuðum skóg

Og glæsileg frásögn af bónda að sæða

 

Sögur af hænsnum og svæsinni geit

Sígrænum högum og marglitum skeljum

En auðséð, þá var þessi asni úr sveit

Og andremman á við fullt haughús frá beljum

 

Nú sjaldan eða aldrei ég sagt hef um neinn

Særandi hluti sem berast um gilið

En djöfulsins fífl þetta drekka má einn

Drulludelinn á það hreinlega skilið